အီဂျစ် အသင်း ကတော့ ကမ္ဘာ့ဖလား ပြိုင်ပွဲ သမိုင်းတစ်လျှောက် သူတို့ရဲ့ ပထမဦးဆုံးသော နိုင်ပွဲကို ရှာဖွေတွေ့ရှိသွားခဲ့ပါပြီ။ အုပ်စု (G) ပွဲစဉ် အဖြစ် ဗန်ကူးဗားမြို့က BC Place ကွင်းမှာ ကစားခဲ့တဲ့ ပွဲစဉ်မှာ အီဂျစ်တို့ဟာ နယူးဇီလန်ကို အနောက်ကနေ လိုက်ကစားပြီး ၃-၁နဲ့ အနိုင်ယူကာ အုပ်စုပထမနေရာကို တက်လှမ်းနိုင်ခဲ့တာ ဖြစ်ပါတယ်။
ဒီပွဲမှာလည်း အီဂျစ်အသင်းရဲ့ သူရဲကောင်း ကတော့ အသင်းခေါင်းဆောင် မိုဟာမက် ဆာလာ ပါပဲ။ သူဟာ အသင်းအတွက် ၁ ဂိုး သွင်းယူပေးခဲ့သလို ၁ ဂိုး ဖန်တီးပေးခဲ့ပြီး အီဂျစ် အသင်းကို ရှုံးထွက်အဆင့် တက်လှမ်းနိုင်ဖို့ အကောင်းဆုံး အခြေအနေ တစ်ခုဆီ ပို့ဆောင်ပေးခဲ့ပါတယ်။
ပွဲအစ ၁၅ မိနစ်မှာတင် နယူးဇီလန်အသင်းက ဦးဆောင်ဂိုး ရသွားခဲ့ပါတယ်။ တင်မ် ပိန်း ကန်တင်ပေးလိုက်တဲ့ ထောင့်ကန်ဘောကနေ တစ်ဆင့် နောက်ခံလူ ဖင်းန် ဆာမန်က ခေါင်းတိုက် သွင်းယူခဲ့တာပါ။ ဂိုးပေးလိုက်ရပေမယ့် အီဂျစ်တို့ စိတ်မပျက်ဘဲ ချေပဂိုး ရဖို့ တောက်လျှောက် ဖိအားပေး ကစားခဲ့ပါတယ်။ ပထမပိုင်းပြီးခါနီးနဲ့ ဒုတိယပိုင်းအစတွေမှာ အီမာမ် အာရှောနဲ့ ဆာလာတို့ အခွင့်အရေး ရခဲ့ပေမယ့် ဂိုးအဖြစ် မပြောင်းလဲနိုင်ခဲ့လို့ အီဂျစ် ပရိသတ်တွေ ရင်တမမ ဖြစ်ခဲ့ရပါသေးတယ်။
ဒါပေမယ့် ပွဲချိန် ၅၈ မိနစ် မှာတော့ အီဂျစ်တို့ စောင့်မျှော်နေတဲ့ အသီးအပွင့်ကို ခံစားခဲ့ရပါပြီ။ မိုစတာဖာ ဇီကိုရဲ့ ပြင်းထန်တဲ့ ခေါင်းတိုက်ချက်ကို နယူးဇီလန်ဂိုးသမား မက်စ် ခရိုကွန်ဘီ ဘယ်လိုမှ မကာကွယ်နိုင်ဘဲ အီဂျစ်တို့ ချေပဂိုး ရရှိသွားခဲ့ပါတယ်။ အဲဒီနောက်ပိုင်း မှာတော့ အီဂျစ်တို့ ပွဲကို လုံးဝ စိုးမိုးသွားခဲ့ပါတယ်။ ချေပဂိုးရပြီး မကြာခင်မှာပဲ လျှင်မြန်တဲ့ တန်ပြန် တိုက်စစ် ကနေ တစ်ဆင့် ဆာလာက ဇီကိုနဲ့ အပေးအယူ လုပ်ပြီး နယူးဇီလန် ဂိုးသမားရဲ့ ဘယ်ဘက်အောက်ထောင့်ထဲကို အနိမ့်ဘောနဲ့ လှလှပပ ကန်သွင်းပြီး ဒုတိယဂိုးကို ရယူခဲ့ပါတယ်။
ပွဲပြီးခါနီး မိနစ် ၈၂ မှာတော့ ဆာလာရဲ့ ထောင့်ကန်ဘော ကနေ တစ်ဆင့် လူစားဝင် ကစားသမား ထရီဇီဂေးက တိုင်နားကနေ ပိတ်သွင်းပြီး အီဂျစ်အတွက် အနိုင်သေချာစေမယ့် တတိယဂိုးကို သွင်းယူပေးခဲ့ပါတယ်။ နာကျင် အချိန်ပိုမှာ ဇီဇို တစ်ယောက် ဂိုးသမား ကိုပါ ကျော်ဖြတ်ပြီးမှ စတုတ္ထဂိုး ရမယ့် အခွင့်အရေးကို ဖြုန်းတီးခဲ့လို့သာ ၃-၁ ရလဒ်နဲ့ပဲ ပွဲပြီးဆုံးခဲ့တာ ဖြစ်ပါတယ်။
ဒီပွဲဟာ အီဂျစ်အသင်းနဲ့ ထိုက်တန်တဲ့ နိုင်ပွဲ တစ်ခု ဆိုတာ ကိန်းဂဏန်းတွေက သက်သေပြနေပါတယ်။ ကွင်းတွင်း ခြေစွမ်းအရ အီဂျစ် အသင်းဟာ ဂိုးပေါက် ကန်ချက် ၁၉ ကြိမ် မျှော်မှန်းဂိုး (xG) ၁.၉၆၊ နယူးဇီလန် အသင်း ကတော့ ဂိုးကန်ချက် ၁၂ ကြိမ် မျှော်မှန်းဂိုး (xG) ၁.၄၇ ရှိခဲ့ပါတယ။ အီဂျစ် ဘုရင် မိုဟာမက် ဆာလာ ကတော့ ဒီပွဲရဲ့ အကောင်းဆုံး ကစားသမား ဖြစ်ခဲ့ပါတယ်။ သူဟာ တစ်ပွဲလုံးမှာ ဂိုးကန်ချက် အများဆုံး (၅ ကြိမ်)၊ ပြိုင်ဘက် ဂိုးဧရိယာအတွင်း ဘောလုံးထိချက် အများဆုံး (၁၃ ကြိမ်)၊ ဂိုးရနိုင်မယ့် အခွင့်အရေး ဖန်တီးမှု အများဆုံး (၅ ကြိမ်) အထိ ပြုလုပ်နိုင်ခဲ့ပါတယ်။
ဒီနိုင်ပွဲနဲ့ အတူ အီဂျစ် အသင်းသားတွေဟာ စံချိန်သစ်တွေ ကိုယ်စီ ရရှိသွားခဲ့ကြပါတယ်။ ဆာလာနဲ့ ဇီကို တို့ဟာ ကမ္ဘာ့ဖလား ပွဲစဉ် တစ်ပွဲတည်းမှာ ဂိုးသွင်းပြီး ဂိုးဖန်တီးမှုပါ လုပ်နိုင်တဲ့ ပထမဦးဆုံးသော အီဂျစ် ကစားသမားများ ဖြစ်လာခဲ့ပါတယ်။ မိုဟာမက် ဆာလာဟာ ကမ္ဘာ့ဖလား ပြိုင်ပွဲ အကြိမ် အရေအတွက် အများအပြားမှာ ဂိုးသွင်းနိုင်တဲ့ ပထမဆုံး အီဂျစ် ကစားသမား ဖြစ်လာသလို၊ ကမ္ဘာ့ဖလား သွင်းဂိုး (၃) ဂိုးနဲ့ အီဂျစ်အသင်းရဲ့ သမိုင်းတစ်လျှောက် ကမ္ဘာ့ဖလားဂိုး အများဆုံး သွင်းသူ (အာဘဒဲလ် ဖောင်ဇီရဲ့ ၂ ဂိုး စံချိန်ကို ကျော်ဖြတ်ပြီး) ဖြစ်လာခဲ့ပါတယ်။ ထရီဇီဂေး ကတော့ ကမ္ဘာ့ဖလား ပြိုင်ပွဲ သမိုင်းမှာ အီဂျစ် အသင်း အတွက် လူစားဝင် ကစားသမား အဖြစ် ကနေ ဂိုးသွင်းနိုင်တဲ့ ပထမဆုံး ကစားသမား ဖြစ်လာပါတယ်။ ဒါ့အပြင် အီဂျစ် အသင်း ကမ္ဘာ့ဖလား ပွဲတစ်ပွဲတည်းမှာ သုံးဂိုး သွင်းနိုင်ခဲ့တာ ဒါဟာ ပထမဆုံးအကြိမ် ဖြစ်ပါတယ်။
အုပ်စု နောက်ဆုံး ပွဲစဉ်မှာ အီဂျစ်အသင်း အနေနဲ့ အီရန် အသင်းနဲ့ သရေကျရုံတင်နဲ့တင် အုပ်စု ပထမ (သို့မဟုတ်) ဒုတိယနဲ့ နောက်တစ်ဆင့် တက်လှမ်းနိုင်တော့မှာ ဖြစ်ပါတယ်။ တစ်ဖက် မှာလည်း နယူးဇီလန် အတွက် မျှော်လင့်ချက်တွေ လုံးဝ ပျက်သုဉ်းသွားတာမျိုးတော့ မဟုတ်သေးပါဘူး။ ဘယ်လ်ဂျီယံနဲ့ အီရန်တို့ ပွဲစဉ်မှာ သရေကျခဲ့တာကြောင့် နယူးဇီလန် အနေနဲ့ အုပ်စု နောက်ဆုံးပွဲမှာ ဘယ်လ်ဂျီယံ ကိုသာ အနိုင်ကစားနိုင်ရင် နောက်တစ်ဆင့် တက်လှမ်းနိုင်မယ့် အခွင့်အရေး ရှိနေပါသေးတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
