ချဲလ်ဆီးနဲ့ ရင်ဆိုင်ရမယ့် ချန်ပီယံလိဂ် အဆုံးအဖြတ် ပွဲစဉ်မှာ အိမ်ကွင်း ပရိသတ်တွေရဲ့ အားပေးမှုက အလွန်အရေးကြီးကြောင်း နာပိုလီ နည်းပြ အန်တိုနီယို ကွန်တီက ပြောကြားလိုက်ပါတယ်။
လက်ရှိ ချန်ပီယံလိဂ် လိဂ်အဆင့် အမှတ်ပေးဇယားမှာ နာပိုလီက အသင်းပေါင်း ၃၆ သင်း အနက် အဆင့် ၂၅ နေရာမှာ ရပ်တည်နေပြီး ရှုံးထွက် ပလေးအောဖ့် အဆင့်နဲ့ နောက်တစ်ဆင့် တက်ရောက်နိုင်ဖို့ တစ်ဆင့်သာ ကွာဟနေပါတယ်။ ဒါကြောင့် ချဲလ်ဆီးနဲ့ ကစားရမယ့် ချန်ပီယံလိဂ် လိဂ်အဆင့် နောက်ဆုံး ပွဲစဉ်က နာပိုလီ အတွက် သေရေးရှင်ရေး တမျှ အရေးကြီးနေပြီ ဖြစ်ပါတယ်။
အန်တိုနီယို ကွန်တီ ကတော့ သူရဲ့ အသင်းဟောင်း ချဲလ်ဆီးကို အနိုင်ယူဖို့ အတွက် ဒီယေဂို အာမန်ဒို မာရာဒိုနာကွင်းရဲ့ လှုံ့ဆော်မှု အပေါ် အဓိက အားကိုးရမယ်လို့ ယုံကြည်နေပါတယ်။ ဒါကြောင့် ဒီပွဲစဉ် မတိုင်ခင် ကွန်တီက အခုလိုပဲ ပြောကြားခဲ့ပါတယ်။ “ကိုပင်ဟေဂင်နဲ့ ပွဲမှာ ကတည်းက အခြေအနေကို ပြင်ဆင်နိုင်ခဲ့သင့်ပေမယ့် ကျွန်တော်တို့ ခြေစွမ်းမပြနိုင်ခဲ့ဘူး။ အခုတော့ ကမ္ဘာ့ကလပ် ချန်ပီယံ ချဲလ်ဆီးနဲ့ ကစားရတော့မယ်။ သူတို့ရဲ့ ရည်မှန်းချက်နဲ့ ရင်းနှီးမြှုပ်နှံမှုတွေကို ကျွန်တော် ကောင်းကောင်း သိပါတယ်။ ကျွန်တော် တို့ရဲ့ အင်အားကြီး မဟာမိတ် ဖြစ်တဲ့ မာရာဒိုနာကွင်းကြီးကို အားကိုးပြီး အစွမ်းကုန် ကြိုးစားသွားရပါမယ်။” လို့ ကွန်တီက ပြောကြားခဲ့ပါတယ်။
နာပိုလီဟာ သူတို့ရဲ့ နောက်ဆုံး ချန်ပီယံလိဂ် အိမ်ကွင်းပွဲ ၂၀ မှာ ၁ ပွဲသာ ရှုံးနိမ့်ထားပြီး ၁၂ ပွဲနိုင်၊ ၇ ပွဲ သရေကျထားတဲ့ မှတ်တမ်းကောင်း ရှိထားပါတယ်။ ဒီအခြေအနေဟာ နေပဲလ် ကလပ်ရဲ့ ပရိသတ်တွေ အတွက်တော့ အားတက်စရာ အချက်တစ်ချက် အဖြစ် ရှိနေမှာ သေချာပါတယ်။
ဒါပေမယ့်လည်း နာပိုလီက အခုလို အရေးကြီး ပွဲမတိုင်ခင်မှာပဲ အသင်းရဲ့ အဓိက ကစားသမား များစွာကို ဒဏ်ရာကြောင့် လက်လွှတ်ထားရပါတယ်။ ဒီပွဲမှာ နာပိုလီက ဒေးဗစ် နီရတ်စ် (ခွဲစိတ်မှု ခံယူထားရ) နဲ့ ဂိုးသမား မီလင်ကိုဗစ်-ဆာဗစ် တို့ လွဲချော်မှာ ဖြစ်သလို ချဲလ်ဆီး ကစားသမားဟောင်းတွေ ဖြစ်တဲ့ ကီဗင် ဒီဘရွန်းနား၊ ဘီလီ ဂီလ်မောတို့ အပြင် အန်ဂစ်ဆာ၊ ရာမန်နီ၊ ဘူကီမာနဲ့ ပိုလီတာနို တို့လည်း ပါဝင်နိုင်မှာ မဟုတ်ပါဘူး။ ပြီးခဲ့တဲ့ပွဲမှာ ရိုမယ်လူ လူကာကူ ပြန်ပါလာနိုင်တာက နည်းပြ အတွက် အားတက်စရာ ဖြစ်ပေမယ့် “ဒဏ်ရာ ပြဿနာက ဘယ်တော့မှ မပြီးဆုံးနိုင်တော့ဘူး” လို့ ကွန်တီက ဟာသနှောကာ ညီးတွားခဲ့ပါတယ်။
ပြီးခဲ့တဲ့ တပတ်က ဂျူဗင်တပ်စ်ကို ၃-၀ နဲ့ ရှုံးနိမ့်ခဲ့တဲ့ ပွဲအပြီးမှာ ဂျူဗင်တပ်စ် နည်းပြ လူစီယာနို စပယ်လက်တီက နာပိုလီကို “ ချန်ပီယံဟောင်း” လို့ သုံးနှုန်းပြောဆိုခဲ့တာကြောင့် ကွန်တီက ပြန်လည် တုံ့ပြန်ခဲ့ပါသေးတယ်။ “ကျွန်တော်တို့ ရင်ဘတ်ပေါ်မှာ စကူဒက်တို (စီးရီးအေ ချန်ပီယံ တံဆိပ်) က ရှိနေဆဲပါ။ အဲဒါဟာ လေးစားမှုနဲ့ ထိုက်တန်ပါတယ်။ စပယ်လက်တီဟာ နည်းပြကောင်း တစ်ယောက် ဖြစ်ပေမယ့် စကားပြောတဲ့အခါ ပိုပြီး သတိထားသင့်တယ်။ သူက ကျွန်တော်တို့ ဆီက ချန်ပီယံဘွဲ့ကို စောစောစီးစီး သိမ်းယူလိုက်သလိုမျိုး ပြောဆိုခဲ့တာက စိတ်မကောင်းစရာပါပဲ။” လို့ ကွန်တီက ဆိုပါတယ်။
နာပိုလီက စီးရီးအေ မှာတော့ အဆင့် ၄ နေရာမှာ ရပ်တည်နေပြီး ဇယားထိပ်က အင်တာမီလန်နဲ့ ၉ မှတ် အကွာမှာ ရှိနေသလို ချန်ပီယံလိဂ် မှာလည်း အရှုံးမပေးဘဲ တိုက်ပွဲဝင်သွားမယ်လို့လည်း ကွန်တီက အခိုင်အမာ ပြောဆိုသွားခဲ့ပါတယ်။ ဒါပေမယ့်လည်း အဆိုးဆုံးတွေ အတွက် ကြိုတင် ပြင်ဆင်ထားပြီး လေးစားမှုနဲ့လည်း ထိုက်တန်ကြောင်း ပြောကြားခဲ့ပါသေးတယ်။ နာပိုလီနဲ့ ချဲလ်ဆီး ကတော့ ၂၀၁၂ ခုနှစ်က နောက်ဆုံး အကြိမ် တွေ့ဆုံထားပြီး စတန်းဖို့ဒ်ဘရစ်ချ်မှာ ချဲလ်ဆီးက ၄-၁၊ ဒီယေဂို အာမန်ဒို မာရာဒိုနာမှာတော့ နာပိုလီက ၃-၁ နဲ့ အနိုင်ရထားပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
