လာလီဂါ ထိပ်သီး ကလပ် ရီးရဲလ်မက်ဒရစ် ကိုတော့ တိုက်စစ်မှူးသစ် တစ်ဦး တရားဝင် ရောက်ရှိလာခဲ့ပြီ ဖြစ်ပါတယ်။ ရီးရဲလ်မက်ဒရစ်ဟာ သူတို့ရဲ့ တိုက်စစ်မှူး ဂွန်ဇာလို ဂါစီယာကို ဖူလ်ဟမ် အသင်းဆီ ရောင်းချဖို့ သဘောတူညီမှုရခဲ့တဲ့နေ့မှာပဲ လီဗန်တေး အသင်းရဲ့ အသက် ၂၁ နှစ် အရွယ် စပိန် တိုက်စစ်မှူး ကားလို့စ် အက်စ်ပီကို ချက်ချင်းပဲ အရ ခေါ်ယူလိုက်ပါတယ်။
အက်စ်ပီကို ခေါ်ယူဖို့ အင်္ဂလန်က ဘရိုက်တန်နဲ့ ဟာလ်စီးတီးတို့ အပြင် ဥရောပ ထိပ်တန်း ကလပ် အသင်း များစွာက သေချာပေါက် ကမ်းလှမ်းမှုတွေ လုပ်နေခဲ့ကြတာပါ။ ဒါပေမယ့်လည်း ဂါစီယာ ထွက်ခွာပြီး နာရီပိုင်း အကြာမှာပဲ ရီးရဲလ်မက်ဒရစ်က အက်စ်ပီရဲ့ အပြောင်းအရွှေ့ထဲ ကြားဖြတ် ဝင်ရောက်ပြီး ယူရို ၂၅ သန်း တန် စာချုပ်လျော်ကြေး ပေးချေကာ ကစားသမားရဲ့ အနာဂတ်ကို ပြောင်းလဲပစ်ခဲ့တာ ဖြစ်ပါတယ်။
AS သတင်းစာရဲ့ ဖော်ပြချက်အရ ရီးရဲလ်မက်ဒရစ်ဟာ နောက်ဆုံး မိနစ်ကျမှ လီဗန်တေးရော အက်စ်ပီရဲ့ အေးဂျင့်ဆီပါ တိုက်ရိုက် ဆက်သွယ်ခဲ့တာပါ။ အက်စ်ပီ ဘက်ကလည်း ဥရောပ ၁၅ ကြိမ် ချန်ပီယံ ရီးရဲလ်ရဲ့ ခေါ်ယူမှုကို ဦးစားပေးချင်တာကြောင့် တခြား ဆွေးနွေးမှု အားလုံးကို ချက်ချင်း ရပ်ဆိုင်းခဲ့ပြီး အခုဆိုရင် နည်းပြ ဟိုဆေး မော်ရင်ညိုရဲ့ အသင်းနဲ့ ပူးပေါင်းသွားခဲ့ပြီ ဖြစ်ပါတယ်။
ရီးရဲလ်မက်ဒရစ်နဲ့ ၅ နှစ်စာချုပ် ချုပ်ဆိုခဲ့တဲ့ အက်စ်ပီဟာ ပြီးခဲ့တဲ့ရာသီ လီဗန်တေးမှာ ခြေစွမ်းပြနိုင်ခဲ့သူပါ။ ၂၀၂၅-၂၆ ရာသီဝက် အထိ ပွဲထွက်ခွင့်ရဖို့ ရုန်းကန်ခဲ့ရပေမယ့် ရာသီအကုန် မှာတော့ အသင်း အတွက် ၂၇ ပွဲမှာ ၁၃ ဂိုး အထိ သွင်းယူပေးခဲ့ပါတယ်။ ပိုပြီး အထင်ကြီးစရာကောင်းတာ ကတော့ ၁၁ ဂိုးကို လာလီဂါ ပြိုင်ပွဲမှာ သွင်းယူခဲ့တာကြောင့် လီဗန်တေး တန်းမဆင်းရအောင် ဆွဲတင်ပေးနိုင်ခဲ့တာပါပဲ။
ရီးရဲလ်မက်ဒရစ်က အက်စ်ပီကို ဘာကြောင့် ခေါ်ယူခဲ့တာလဲ
အကယ်ဒမီထွက် တိုက်စစ်မှူးစစ်စစ် ဂွန်ဇာလိုကို လက်လွှတ်လိုက်ပြီးမှ တခြား တိုက်စစ်မှူး တစ်ယောက်ကို ပိုက်ဆံပေးခေါ်တာဟာ ကြည့်ရတာ ရှုပ်ထွေးသလို ရှိပေမယ့် စီးပွားရေး အရတော့ ရီးရဲလ် အတွက် တော်တော်လေး တွက်ခြေကိုက်တဲ့ အပြောင်းအရွှေ့ ကစားကွက် ဖြစ်ခဲ့ပါတယ်။
ဂွန်ဇာလိုဟာ ဖူလ်ဟမ် အသင်းရဲ့ နည်းပြသစ် ဖြစ်သူ အဲလ်ဗာရို အာဘီလိုအာရဲ့ အဓိက ပစ်မှတ် ဖြစ်ခဲ့ပြီး အာဘီလိုအာ ကလည်း သူ့ကို ခေါ်ယူဖို့ ငွေပုံအော သုံးချင်နေတာကို ရီးရဲလ်က သိထားပါတယ်။ သတင်းတွေအရ ဖူလ်ဟမ်ဟာ ဂွန်ဇာလို အတွက် ယူရို ၄၀ သန်းနဲ့ ရီးရဲလ် ကာစတီလာရဲ့ ကြယ်ပွင့် စီဆာ ပါလာစီယို့စ် အတွက် ယူရို ၁၀ သန်း ပေးချေခဲ့ရတာပါ။
ဒီတော့ ရီးရဲလ်ဟာ ကစားသမား နှစ်ယောက်ကို ရောင်းထုတ်ပြီး ရရှိလာတဲ့ ငွေကြေး တချို့နဲ့ပဲ ဂွန်ဇာလိုရဲ့ နေရာမှာ အစားထိုးဖို့ အက်စ်ပီကို ယူရို ၂၅ သန်းနဲ့ ပြန်ခေါ်ခဲ့တာမို့ ယူရို ၂၅ သန်းခန့် အမြတ်ကျန်ခဲ့တယ်လို့ ဆိုရမှာ ဖြစ်ပါတယ်။ ဒါ့အပြင် အသင်း အနေနဲ့ အရင်က ဟိုဆေးလူလိုမျိုး အသင့်သုံး တိုက်စစ်မှူးစစ်စစ် တစ်ယောက်ကို ရရှိသွားတာလည်း ဖြစ်ပါတယ်။ အက်စ်ပီဟာ လူစားဝင် ကစားသမား အဖြစ် ပွဲထွက်လာပြီး ဂိုးရအောင် လုပ်ပေးနိုင်သလို၊ ပွဲကြပ်ချိန်တွေ မှာလည်း မော်ရင်ညို အနေနဲ့ ပင်ပန်းနေတဲ့ အဓိက ကစားသမားတွေကို အနားပေး အလှည့်ကျ သုံးနိုင်ဖို့ အတွက် ပြည်တွင်း ရှုံးထွက်ဖလား ပွဲတွေမှာ ပွဲထွက် ကစားပေးနိုင်တဲ့ ကစားသမားမျိုးလည်း ဖြစ်ပါတယ်။ ဒါဟာ အာဘီလိုအာ တာဝန်ယူစဉ်က အားနည်းခဲ့တဲ့ အလှည့်ကျစနစ်ကို ပိုကောင်းမွန်သွားစေမှာလည်း ဖြစ်ပါတယ်။
ရီးရဲလ်ကို ပြောင်းရွှေ့တာဟာ အက်စ်ပီ အတွက် စိန်ခေါ်မှု ကြီးမားနိုင်သလား
ရီးရဲလ်မက်ဒရစ်လို လာလီဂါ ကလပ်ကြီးက ကမ်းလှမ်းလာရင် ငြင်းဆန်ဖို့ ခက်ခဲပေမယ့် အက်စ်ပီ အတွက်တော့ ဘာနေဗျူးမှာ ကစားရမှာဟာ ကစားသမား ဘဝ အတွက် စိန်ခေါ်မှု ကြီးမားလှပါတယ်။ သေချာတာက သူဟာလည်း ဂွန်ဇာလို ကြုံတွေ့ခဲ့ရတဲ့ အခက်အခဲတွေ ကိုပဲ ရင်ဆိုင်ရနိုင်ပါတယ်။ ဘာလို့လဲဆိုတော့ တိုက်စစ်နေရာမှာ အမ်ဘာပေးနဲ့ အန်းဒရစ်ခ် တို့ရဲ့ အနောက်မှာပဲ နေရာရနိုင်မှာ ဖြစ်သလို၊ အမ်ဘာပေး ဒဏ်ရာရလို့ပဲ ဖြစ်ဖြစ်၊ အနားပေးချင်လို့ပဲ ဖြစ်ဖြစ် ဗင်နီးစီးယက်စ်နဲ့ တွဲဖက် ကစားဖို့ ဘရာဟင်မ် ဒီးယက်ဇ်လို ကစားသမားနဲ့ပါ ပွဲထွက်ခွင့် ယှဉ်ပြိုင်ရဦးမှာပါ။
အသက် ၂၁ နှစ် အရွယ် တိုက်စစ်မှူး အနေနဲ့ ကိုပါဒယ်ရေးဖလားပွဲတွေမှာ တောက်ပခွင့်ရနိုင်ပေမယ့် ရီးရဲလ်မက်ဒရစ်က ဒီပြိုင်ပွဲမှာ စောစောစီးစီး ထွက်ရလေ့ ရှိတာ ကိုလည်း သတိထားရပါမယ်။ ပြီးခဲ့တဲ့ရာသီက ဆိုရင် ဒုတိယတန်း ကလပ် အယ်လ်ဘာစီတီ အသင်း ကိုတောင် ၁၆ အသင်း အဆင့်မှာ အရှက်တကွဲ ရှုံးနိမ့်ပြီး ထွက်ခဲ့ရတာပါ။ တကယ်လို့ အက်စ်ပီသာ အင်္ဂလန်က ဘရိုက်တန် ဒါမှမဟုတ် ဟာလ်စီးတီးကို ပြောင်းခဲ့ရင် ကစားခွင့် မိနစ် များစွာ ရရှိနိုင်မှာ ဖြစ်ပေမယ့် အခုတော့ မော်ရင်ညိုရဲ့ လူစာရင်း အရန်ခုံမှာ အစားထိုး ကစားသမား တစ်ယောက်ထက် မကဘဲ အဓိကနေရာ ရအောင် တိုက်ပွဲဝင်သွားရတော့မှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
